Plantun de Prouvènço

Pèr coumpara dos planto d'encò nostre

Leucanthemum vulgare subsp. leucolepis & Scleranthus annuus

Margarido-di-prat

Leucanthemum vulgare subsp. leucolepis

Asteraceae Compositae

Àutri noum : Margarido, Pèd-de-gau, Pèd-de-jau.

Nom en français : Marguerite commune.

Descripcioun :
Margarido que se pòu destria de si cousino de basso Prouvènço. A de fueio de margarido-di-prat e li bratèio claro de margarido-palinello. La classificacioun èi pancaro bèn seguro, pèr d'ùni la faudrié renja dins li Leucanthemum pallens (Flora gallica op. cit.), pamens li fueio nous sèmblon bèn diferènto ("Flore med." op. cit.).

Usanço :
Soun li mémis usanço que la margarido-di-prat.

Port : Grando erbo
Taio : 15 à 100 cm
Fueio : alterno
Tipe bioulougico : Emicriptoufite
Cicle bioulougico : Renadivo mounoucarpico

Gènre : Leucanthemum
Famiho : Asteraceae
Famiho classico : Compositae
Tribu : Anthemideae
Ordre : Asterales

Coulour de la flour : Blanco Jauno
Petalo : >6
Ø (o loungour) enflourejado : 2,5 à 5 cm
Flourido : Estiéu - Autouno

Sòu : Ca
Autour basso e auto : 0 à 1700 m
Aparado : Noun

Liò : Tepiero seco
Estànci : Mesoumediterran à Mountagnard
Couroulougi : Éuropènco-Sud
Ref. sc. : Leucanthemum vulgare subsp. leucolepis Briq. & Cavill.., 1916

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.